અપડેટ્સ

- ગરમીનો પ્રકોપ સંપુર્ણ માત્રામાં ખીલેલો છે. (મારા જેવો ઠંડો જીવ પણ એ.સી. ના રવાડે ચડી જાય એ આ ગરમીના પ્રકોપની મોટી નિશાની.)

- પૃથ્વીને અગનગોળો બનતી બચાવવા માટે શ્રધ્ધાળુંઓ હવે  ‘ગરમી-દેવી’ ના મંદિરે જઇને ઠંડાઇ-ચાલિસાના પાઠ કરે તો કદાચ કોઇ કૃપા થાય… (આ ગરમીદેવીની ‘કૃપા’ સાથે નિર્મલ બાબાને કાંઇ લેવા-દેવા નથી.)

- ભ્રષ્ટાચાર, ક્રિકેટ, બાબાઓના ભવાડા, ગોટાળા, પેટ્રોલના ભાવ, નેતાઓના કાંડ, વગેરે વગેરે વગેરે….. આ બધી આપણાં દેશની કાયમી સમસ્યાઓ છે જેની હવે મારા બગીચામાં નોંધ લેવી જરૂરી નથી લાગતી.

- આમ જોઇએ તો માણસજાતનો સ્વભાવ જ હોય છે ફરિયાદ કર્યા કરવાનો. શિયાળામાં ઠંડીથી, ઉનાળામાં ગરમીથી અને ચોમાસામાં વરસાદથી આપણને વાંધો હોય છે બોલો !! કયારેક વિચાર આવે કે આપણે કેટલા જલ્દી કંટાળી જઇએ છીએ..

- ભાણીયાંઓથી ઘર ગુંજી રહ્યું છે અને એમાંયે કાલે રજા છે. આજે સવારે જ મારી પાસે કબુલાવવામાં આવ્યું છે કે હું કાલે સાંજે તે બધાને કાંકરીયા ફરવા લઇ જઇશ. (હે પરવરદિગાર…..વેકેશનના સમયે રજાના દિવસે હરવા-ફરવા અને ખાવા માટે કીડી-મકોડાની જેમ ઉભરાતા મારા અમદાવાદી નાગરિકોની ભીડમાં સમાવવા મને થોડી જગ્યા દેજે…)

- આવતી કાલે ‘ઇશકજાદે’ જોવાનો પ્લાન છે એ પણ એકલા-એકલા !!! જે કોઇ સાથે આવવા ઇચ્છતું હોય તે આજે નામ નોંધાવી શકે છે. (સ્ટોરીમાં આપણને કોઇ રસ નથી. હું તો ફિલ્મની હિરોઇનને જોવા માટે જોવા જવાનો છું. સાંભળ્યું છે કે બહુ મસ્ત છે… )

- ચલો, ઓફિસ ટાઇમ પુરો થવા આવ્યો છે…તો હવે ઘર તરફ પ્રયાણ કરીએ.

. . .

એક મજબુરી…

. . .

શ્રી શ્રી શ્રી અ.જ્ઞાની બાબા બગીચાનંદના સંવેદનોમાંથી..
આજે…
કોઇ નાજુક ક્ષણે અનુભવાયેલી મજબુરી…

. .

. .

(નોંધ – અહી દરેક સહમત થાય તે જરૂરી નથી.)

. . .

મે મહિનાની ખાટીમીઠી

. . .

- હવે, બિમારીનો અંત અને સ્વસ્થ બનવાની શરૂઆત. (પણ મારી બેટરી હજુ ઉતરેલી જણાય છે. રિચાર્જ માટે દવાઓ ચાલું રાખવાની છે.)

- ખોવાયેલા ફોનનું સિમકાર્ડ અઠવાડીયા પછી નવું બન્યું. (થેંક્સ ટુ મોબાઇલ સર્વિસ પ્રોવાઇડર…પહેલા ૨ કલાક કહ્યા અને પછી ૪-૫ દિવસ ‘સિસ્ટમમાં પ્રોબ્લેમ’ કહીને કાઢ્યા.)

- ઘરે નવરા હોવાથી દેખવાની બાકી એવી ઘણી સરસ ફિલ્મને જોઇ કાઢી અને સાથે-સાથે ઘરમાં નિયમિત ચાલતી પણ મજબુરીના કારણે ઘણી ડેઇલી-સિરિયલ પણ જોવાઇ ગઇ…

# મજબુરીમાં નોંધાયેલી કેટલીક માહિતીઓ…
- ખબર પડી કે “સાસ બિના સસુરાલ’માં બહારથી ઇમ્પોર્ટેડ સાસુઓ આવીને બબાલ કરી જાય છે. (ઇનશોર્ટ ટીવી સિરિયલમાં ‘સાસુ’ એક બબાલપ્રિય પ્રાણી હોય છે.)
- ‘કુછ તો લોગ કહેંગે’માં આસુતોષ બદલાઇ ગયો છે તો હવે નીધિ સાથે તેને જોવાની મજા નથી આવતી. (પણ છેવટે બન્ને ઠેકાણે પડયા એ ઠીક થયું.)
- ‘પરવરિશ’માંથી કોઇ ખાસ પરવરિશ શીખવા જેવી નથી. (બાળકો તેમાંથી ચોક્કસ શીખશે કે તેમણે કેવા નખરાં કરવા જોઇએ.)
- ‘યે રિસ્તા કયા……”માં અક્ષરા હજુયે રોતી જ દેખાય છે. (હશે…. તેને એ જ કરવાના સારા પૈસા મળતા હશે.)
- ગોપીવહુ હજુ બુધ્ધુ જેવી જ છે… અને ‘ઉતરન’નો મુળ કોન્સેપ્ટ કયાંય ખોવાઇ ગયો છે અને કથા કયાંક આડીઅવળી રીતે આગળ વધી ગઇ છે..
-’બડે અચ્છે લગતે હૈ’ની સ્ટોરી રામ-પ્રિયા કપુરથી હટીને સાઇડ એકટરની લાઇફમાં વધારે તન્મય જણાય છે. (આ ટીવી સિરિયલમાં સ્ત્રી પાત્રો ન હોત તો તે આગળ કેમ વધતી હોત તે એક વિચારણા માંગી લે તેવો મુદ્દો છે !)
- ‘બાલિકા વધુ’ની આનંદી મોટી થઇ ગઇ છે પણ સિરિયલ છે કે હજુ ખતમ થવાનુ નામ નથી લેતી…।
અને બીજુ આવું-જેવુ-તેવુ-ઘણું-બધુ વગેરે વગેરે વગેરે…. (બસ, દરેક વાત અહીયા ઉમેરીને કોઇની ઉપર માનસિક ત્રાસ નથી ગુજારવો.)

- હવે વાતનો મુદ્દો બદલે તો સારું એમ લાગે છે ને….. ઓકે… એક નવી વાત..

- ગરમીની વચ્ચે વરસાદ પણ અચાનક આવીને હાજરી પુરાવી ગયો. એક આધારભુત વ્યક્તિ દ્વારા જાણકારી મળી કે તે વરસાદ કુદરતી નહોતો પરંતુ કૃત્રિમ-વરસાદ હતો. વૈજ્ઞાનિકોની એક ટુકડી દ્વારા અત્યારે ગુજરાતમાં તેના પરિક્ષણ ચાલુ છે તેવી પાક્કી માહિતી છે અને રાજકોટમાં થયેલા વરસાદમાં પણ તેમનો જ હાથ હતો તેવા સમાચાર પણ છે. (કંઇક સાચુ કે ખોટું હોઇ શકે પણ જાણકારી આપનાર વ્યક્તિની માહિતી ખોટી હોવાના ચાન્સિસ ઘણાં ઓછા છે.)

- પેન્ટાલુન-બિગબઝાર વાળા ‘ફ્યુચર ગ્રુપ’ના શ્રી કિશોર બિયાનીનું સુધા મહેતા દ્વારા ગુજરાતી અનુવાદિત પુસ્તક ‘સપનાથી સફળતા’ ઘણું સરસ છે. (હજુ પુરું વાંચવાનુ બાકી છે પણ રસપ્રદ લાગે છે અને ભાષા પણ એકદમ સરળ છે.)

- આપણાં પુર્વ મુખ્યમંત્રી શ્રી કેશુભાઇ આજકાલ શ્રીમાન દિગ્વિજય સિંહની જેમ ગમે ત્યાં કંઇ પણ કહીને વિવાદ ઉભો કરવા લાગ્યા છે. હમણાં જ્ઞાતિવાદી સમારંભો જોરશોરમાં ચાલી રહ્યા છે જેમાં આપણાં હાલના મુખ્યમંત્રી પણ જોશભેર ભાગ લઇ રહ્યા છે. (લોકો માંડ જ્ઞાતિવાદી રાજકારણથી છુટા પડતા દેખાતા હતા ત્યાં વળી જ્ઞાતિવાદી સમિકરણો ફરી જોડાવા લાગ્યા છે. હે ભગવાન…. કયારે સુધરશે અમારા આ નેતાઓ..)

- વિકટ પ્રશ્ન : કાલે કંઇક ખાસ છે તેવુ રિમાઇન્ડર અત્યારે મળ્યું પણ સાલું યાદ નથી આવતુ કે તે શું હતું…કાલે આખો દિવસ વિચારવું પડશે. (રિમાઇન્ડર મુકતી વખતે તેની નોંધ ન ઉમેરવાથી આવી પરિસ્થિતિ ઉદભવે.)

- વિનંતી : નવા ફોનમાં હજુ કોન્ટેક્ટ્સ ઉમેરવામાં થોડો સમય લાગે તેમ છે એટલે જો કોઇ મને કૉલ કરો તો મહેરબાની કરીને આપની ઓળખાણ હું પુછુ ત્યારે કોઇ સવાલ કર્યા વિના આપી દેશો તો ઘણો ઉપકાર રહેશે.

. . .

આજકાલની નવાજુની

. . .

- ગયા વર્ષના ઉનાળામાં થયેલ ડેન્ગ્યુ-ટાઇફોઈડ-મેલેરીયાની ત્રીપલ બિમારીની શાહી સુકાઇ નથી ત્યાં આ વર્ષે પણ મે મહિનાની બિમારી સાથે ધમાકેદાર શરૂઆત થઇ છે. (દર વર્ષે એકાદવાર કોઇ મોટી બિમારીના ભોગ બનવું એ જાણે એક કુદરતી નિયમ બની ગયો છે.)

- લગભગ આઠ દિવસથી દિવસના ચોક્કસ સમયે મારી મુલાકાત લેતો અસહ્ય તાવ અને અશક્તિનો હુમલો મને ઘણો સતાવી રહ્યો છે. છેવટે થોડા દિવસની દવા બાદ સ્થિતિમાં સુધારો ન જણાતાં બે દિવસ પહેલા જ બ્લ્ડ-રિપોર્ટ કરાવવામાં આવ્યો. (લેબોરેટરીવાળાએ ટેસ્ટ કરવા માટે બે ઇંજેક્શન ભરીને લોહી કાઢી લીધું એ જોઇને મારું તો શેર લોહી બળી ગ્યું બોલો..)

- દસમા ધોરણની બોર્ડની પરિક્ષાના પરિણામ સમયે નાપાસ થનાર વિદ્યાર્થીને જેટલો ડર માર્કશીટ હાથમાં આવવાનો હોય એટલો ડર કાલે બ્લ્ડરિપોર્ટ લેવા જતી વખતે હતો. પરંતુ…… પેલો નાપાસ થનાર વિદ્યાર્થી ફસ્ટકલાસ સાથે પાસ થાય ત્યારે તેને લાગે એવો સુખદ (અને આશ્ચર્યજનક) ઝાટકો મને પણ લાગ્યો જ્યારે મે જાણ્યું કે મારા દરેક રિપોર્ટ નોર્મલ છે. (હાશ…….)

- રિપોર્ટ લઇને સીધા ડૉક્ટરસાહેબ સાથે મુલાકાત ગોઠવવામાં આવી અને રિપોર્ટ નોર્મલ આવ્યાની બધી ખુશી હવામાં ‘છુ’ થઇ ગઇ. કારણ – શ્રીમાન ડૉક્ટરની આ સલાહ – “દરેક રિપોર્ટ નોર્મલ છે પણ શરીરમાં બિમારી ચોક્કસ છે એટલે હવે દવાઓના અખતરા કર્યા સિવાય જલ્દી જ હોસ્પિટલમાં દાખલ થઇ જવું યોગ્ય છે.” (મમ્મી મને હોસ્પિટલમાં દાખલ નથી થવું…. આવી જીદ પણ ન કરી શકીએ. કેમ કે હવે મારી મોટામાં ગણતરી થવા લાગી છે ને…)

- કામકાજની જરૂરી વ્યસ્તતા છોડીને દાખલ થઇ જવું લગભગ અશક્ય છે અને હેલ્થ પણ જરૂરી છે. છેવટે આખો ‘કેસ’ યોગ્ય દલીલ સાથે પપ્પાની ફાસ્ટટ્રેક કોર્ટમાં રજુ કરવામાં આવ્યો. જજ પપ્પાએ નિર્ણય જાહેર કર્યો કે પરિવારના ખાસ મિત્ર એવા એક અનુભવી ડોક્ટરની સલાહ લેવી અને તેઓ જે કહે તે મુજબ આગળ વધવું. (નિર્ણયનો અમલ સત્વરે થાય તેવો હુકમ પણ તેમાં સામેલ હતો.)

- કાલે રાત્રે જ ડોક્ટર-મિત્રની મુલાકાત લેવામાં આવી. અગાઉની દરેક દવાઓ અને રિપોર્ટના અભ્યાસ બાદ તેમનો નિર્ણય – “અત્યારે દાખલ થવાની કોઇ જરૂર નથી લાગતી, શારીરિક થાક જણાય છે અને શરીરને આરામની ખાસ જરૂર છે. ઓછામાં ઓછા ત્રણ દિવસનો ઘરે સંપુર્ણ આરામ અને થોડી દવાઓથી બિલકુલ ઠીક થઇ જવાશે.” (આ ડોક્ટર ઘણાં સારા છે. જોયું, કેવી સારી સલાહ આપે છે !!)

- ખાવા-પીવામાં અને દવાઓ લેવામાં કેટલાક નિયમો પાળવાના છે. (અહી ‘મગનું પાણી પીવું’, ‘ખીચડી ખાવી’ વગેરે જેવા કેટલાક અઘરા નિયમોનો સમાવેશ થાય છે.) કામકાજને ફોનથી જ ‘પતાવવા’ એવો ડોક્ટરનો ચોખ્ખો આદેશ છે. ભીડ-ભાડ વાળી જગ્યા, લગ્ન પ્રસંગનું ભોજન, બહારનો નાસ્તો, તીખું-તળેલું વગેરેનો થોડા દિવસ ત્યાગ કરવો એવું ‘ખાસ’ સુચવવામાં આવ્યું છે. (પુસ્તકમેળાની મુલાકાત કેન્સલ. )

- એક દુખદ નોંધ : મારો મોબાઇલ કાલે ખોવાઇ ગયો છે અને તેની સાથે જોડાયેલી ઘણી યાદો પણ ખોવાઇ ગઇ. થોડી-ઘણી શોધખોળ બાદ તેનો પત્તો ન લાગતા છેવટે આજે સવારે તેને કાયમ માટે ગુમાવેલો ગણીને તેની ‘સિમકાર્ડ સર્વિસ’ બંધ કરાવી દેવામાં આવી છે. બીજા સિમકાર્ડ અંગે સોમવારે કાર્યવાહી કરવામાં આવશે. (મોબાઇલ ખોવાયાના કેસમાં પોલિસ ફરીયાદ કરીને કોઇ ફાયદો નથી હોતો. કેમ કે ‘બિતા હુઆ વક્ત ઔર ખોયા હુઆ મોબાઇલ કભી વાપસ નહી મિલતા’.)

- ફાઇનલી, આજે…..

• સવારથી આ સાહેબ આરામ પર છે.
• ખવડાવી-પીવડાવીને મમ્મીએ થકાવી દીધો છે. (મેડમજી તો પીયર ગયા છે.)
• નવરા રહેવાનો ઘણો કંટાળો આવે છે.
• અત્યારે.. લેપટોપને બંધ કરવાનો આદેશ મળી રહ્યો છે.
• ખોવાયેલા ફોનની શોકસભા હજુ ચાલું છે’. જેને પણ ભાગ લેવો હોય તે ઘરે આવી શકે છે. (‘રડવાની પ્રથા બંધ છે.)
• કોઇ સારું પુસ્તક શોધું છું જેમાં વધારે વિચારવું ન પડે અને મારો સમય પસાર કરવામાં મદદરૂપ પણ બને.
• અને હું આનંદમાં છું.

. .

# આજનું જ્ઞાન:

- આરામ કરવાનો પણ કયારેક થાક લાગતો હોય છે.

. . .

એપ્રિલની નવાજુની

. . .

- માર્ચ મહિનાનું ઍકાઉન્ટીંગ કામ એપ્રિલમાં પણ જોરશોરથી ચાલું છે. (આખુ વર્ષ કામ છોડીને ભટકયા કરો એટલે આવી હાલત થાય.)

- છેલ્લા બે મહિના દરમ્યાન અન્ય કોઇ જવાબદાર વ્યક્તિ ન હોવાથી માલિક તરીકે ફુલ ટાઇમ ઑફિસમાં બેસવાનો ફાયદો એ થયો કે મારી કાર્યક્ષમતા વધારો અને આડી-અવળી ઉછળકુદમાં ઘણો ઘટાડો નોંધાયો છે. (હવે હું એક જગ્યાએ લાંબા સમય સુધી સ્થિર બનીને કામ કરી શકુ છું.)

- અને નુકશાન એ થયું છે કે હું બહારની મસ્ત-મનચલી દુનિયાથી જાણે દૂર ફેંકાઇ ગયો છું. મિત્રો-યાર, સગા-સબંધી અને લગ્ન-સગાઇ જેવા દરેક પ્રસંગ કેન્સલના લિસ્ટમાં ગોઠવાઇ ગયા છે. (ઘણી ઇચ્છા હોવા છતાં કયાંય જઇ શકાય તેમ નથી.)

- આટલી મોટી દુનિયામાં જયારે આખો દિવસ માત્ર એક ઑફિસમાં વિતાવીને પુરો કરવો પડે એ તો જીવતા નર્ક સમાન કહેવાય. (આ સ્થિતિમાં સુધારો કરવો અતિઆવશ્યક છે.)

- જીવનમાં કોઇ નવા કાર્ય કે કામથી આગળ વધીને કંઇક ક્રિએટિવ ન કરી શકે તેવો માણસ નકામો કહેવાય. સમય ન મળવો તે લગભગ બહાનામાં જ આવે છે કેમ કે માણસ એક એવું પ્રાણી છે જે તેની ગમતી પ્રવૃતિ માટે ટાઇમ કઇ રીતે કાઢી લેવો તે ખુબ સારી રીતે જાણે છે. (‘હું માણસ છું’, એ મને જ સાબિત કરવું પડશે.)

- ફેસબુક-મેસેજમાં દબાયેલી એક માહિતી મેળવવા માટે ફેસબુકમાં એન્ટ્રી લેવામાં આવી. માહિતી તો મેળવી લેવાઇ પણ હવે માર્કભાઇની સિસ્ટમ મારા FB ઍકાન્ટને ડીએક્ટિવેટ કરવા નથી દેતી. (તે લોકો તેમની ટેકનીકલ ભાષામાં એમ કહે છે કે “કોઇ સમસ્યા છે, થોડા સમય પછી પ્રયાસ કરજો.”) જુઓ, સમસ્યા કંઇક આવી છે - click here (કોઇ મિત્ર પાસે અન્ય વિકલ્પ હોય તો જાણ કરવા વિનંતી.)

# ઇવેન્ટ્સ :

- આજે સાંજે અમદાવાદમાં ‘તોફાની ત્રિપુટી’ દ્વારા આયોજીત અને શ્રી તાહા મન્સૂરી સંચાલિત કાવ્ય/ગઝલ પઠનનો “તોફાની મુશાયરો” યોજવામાં આવી રહ્યો છે. જેમાં ફેસબુક પર વાંચવા મળતા કવિમિત્રોને એક મંચ પર લાવવાનો આ પ્રથમ પ્રયાસ છે. (સમયનો ઘણો અભાવ છે તો પણ ત્યાં સુધી પહોંચવાના સંપુર્ણ પ્રયાસ રહેશે.)  સમય અને સ્થળ અંગેની માહિતી માટે બાજુમાં દેખાતા ફોટો પર ક્લિક કરો.

 - આ વેકેશનમાં વાંચે ગુજરાત અભિયાન અંતર્ગત સાબરમતી રિવરફ્રન્ટ પર વાંચનપ્રેમીઓ માટે અ.મ્યુ.કો દ્વારા રાષ્ટ્રિય પુસ્તક મેળાનું જાહેર આયોજન કરવામાં આવ્યું છે. ૭ દિવસના આ પુસ્તકમેળામાં દરેક દિવસે અલગ-અલગ આકર્ષણનું આયોજન પણ છે. વધુ માહિતી માટે મુલાકાત લો - http://deshgujarat.com/2012/04/27/narendra-modi-to-inaugurate-amdavads-first-national-book-fair-from-1st-of-may/

. . .